Lea-Artibai eta Mutriku

Arartekoarengana jo dute Ekologista Taldeak eta Alleri Zaindu Plataformako kideek. Hartara, Alleriko paduran egitekoak diren etxebizitzen proiektuan «behar diren neurriak hartzeko» eskatu diote Iñigo Lamarkari.
Horri lotuta, ahal denik eta arinen Alleriko plangintzaren gaineko informazio teknikoa, prozesuaren kokapena, egitasmoa aurrera eroateko dauden arrazoiak eta oraintxe momentuan gestioak zelan dauden «ahalik eta gardentasun» handienagaz jakin eragiteko eskaria egin dute ekologistek.

Eguzkik behin eta berririo salatu duenez, «isiltasun administratiboa» jaso dute Ondarroako Udaleko agintariengandik. Lamarkari jakin eragin diote hori, Udalean iazko maiatzean aurkeztutako hiru alegazioen gaineko informazioa gehituta.
Urtebete bete da alegazioak aurkeztu zituztenetik
2007ko ekainean Udalean aurkeztu zituzten alegazioak ekologistek. Eusko Jaurlaritzako Ingurumen Sailari eta Kostaseko Zuzendaritzari eskariok helarazi zizkieten orduan, bai eta Alleri errekuperatzeko plan bat egiteko eskatu ere, «daukan balioa emanda».
Aurkeztutako lehenengo alegazioak Allerin etxebizitzak egiteko «lur mugimenduak» hartzen ditu kontuan, eta «horrek babestutako gunean eragingo lituzkeen kalteak». Hori dela eta, urperatze kotak aztertzeko eskaria egin zuten ekologistek, eta Artibaiko ubidean beharrok eduki ditzaketen eraginak neurtzea: Allerin udal sustapeneko etxebitzitak eraikitzeko plana ez onartzea, harik-eta eraginen azterketa sakona egin artean.
Padurako animalia eta landareek jasan dezaketen kaltea aztertzeko eskaria biltzen du bigarren alegazioak. Izan ere, Babes Hertsiko katalogazioa daukaten animaliak daude Allerin, Bisoi europarra (Mustela Iutreola), esate baterako.
Hirugarren alegazioan Alleri Europako erkidegoko Intereseko Leku izendatuta dagoela jasotzen da. Horri lotuta, beharreko baimenak lortzeko eskaria egin zioten Udal agintariei.